Prishtinë, anulohet koncerti për Ditën e Flamurit – Arrestohet Albin Kurti

protesta prishtineKoncerti i planifikuar nga Komuna e Prishtinës me rastin e 28 Nëntorit është anuluar nga vetë bordi i këtij institucioni.

Lajmin e ka bërë të ditur vetë Komuna, përmes një komunikate për shtyp ku thotë se shkak për këtë vendim është bërë dhuna e policisë ndaj deputetëve dhe simpatizantëve të lëvizjes Vetëvendosje, që çoi në arrestimin e deputetit Albin Kurti.

“Pas terrorit të ushtruar ndaj aktivistëve, deputetëve dhe simpatizantëve të Vetëvendosjes nga shteti policor i Isa Mustafës dhe Hashim Thaçit është vendosur të anulohet koncerti i parashikuar të mbahej sonte në sheshin Skëndërbej”, thuhet në komunikatë.

_______________________________________________________________

Arrestohet Albin Kurti, mbështetësit përleshen me policinë

Kurti ftoi në bashkim kombtarë

Policia e Kosovës ka arrestuar deputetin e lëvizjes Vëtevendosje, Albin Kurti, pasi ka mbajtur të rrethuar selinë e ketij subjekti politik në Prishtinë.

Menjëherë sapo kanë shkuar pranë selisë, mbështetësit e lëvizjes Vetëvendosje u kanë kërkuar forcave speciale që të largohen e madje kanë filluar edhe të përleshen me to.

Nga ana e saj, policia ka reaguar duke përdorur gazin lotësjellës për të shpërndarë mbështetësit, disa prej të cilëve më pas edhe i ka arrestuar.

Më pas forcat speciale kanë hyrë me dhunë në selinë e VV-së dhe kanë arritur të bëjnë arrestimin e Kurtit, ndërsa në pranga ka përfunduar edhe çdo person që ka penguar operacionin.

Mes dhjetëra aktivistëve të ndaluar janë zyrtarja e Komunës së Prishtinës,  Saranda Bogujevci dhe këshilltari Ylli Hoxha.

Bogujevci, e mbijetuar e masakrës së luftës në Kosovë ku iu shfarros familja nga forcat serbe, aktualisht është drejtoreshë e Kulturës në Komunën e Prishtinës.

_______________________________________________________________

 

Prishtinë, mbyllet pa incidente protesta e opozitës

Mijëra qytetarë të Kosovës kanë marrë pjesë në protestën e ftuar nga tri subjektet opozitare në sheshin “Zahir Pajaziti” në Prishtinë, për të kundërshtuar marrëveshjen e Asociacionit të Komunave me shumicë serbe dhe atë për demarkacionin me Malin e Zi.

Në mesin e protestuesve ishte edhe deputeti i Vetëvendosjes Albin Kurti, i cili edhe pse ka një fletëarrest është paraqitur në foltore dhe ka mbajtur fjalim para qytetarëve, duke përsëritur kundërshtimin ndaj marrëveshjeve që i ka nënshkruar qeveria e Kosovës me Serbinë dhe me Malin e Zi.

“Vetëm me këtë flamurin e kuq, me shkabën e zezë krenare në mes, ne mund të avancojmë e mund të përparojmë në të ardhmen tonë edhe më fuqishëm se në historinë tonë. Por kurrësesi nuk mund të ecim përpara me atë flamurin lara-lara që e kanë nxjerrë nga qesja këta tregtarë flamujsh, që e uzurpuan shtetin dhe pushtetin për t’u pasuruar vetë e për të ndihmuar Serbinë”, deklaroi Kurti.

Edhe liderët e tri subjekteve opozitare, Visar Ymeri, Ramush Haradinaj dhe Fatmir Limaj i bënë thirrje kryeministrit Isa Mustafa dhe zëvendëskryeministrit Hashim Thaçi që të tërhiqen nga marrëveshjet e nënshkruara, pasi sipas tyre ato marrëveshje dëmotjnë Kosovën.

“Ne sot jemi këtu të gjithë së bashku për të dërguar mesazhin tonë të fuqishëm se jemi kundër këtyre dy marrëveshjeve të cilat pakësojnë territorin e Kosovës dhe pakësojnë sovranitetin e vendit tonë”, tha Limaj.

“Pushteti na ka nxjerrë në rrugë, sepse dëshiron ta bëjë Serbinë zot shtëpie në Kosovë. Na ka detyruar të përdorim gaz, se dëshiron t’i falë tokë Malit të Zi. Ne i themi jo, se Kosova është një e s’bëhet dy. Pushteti po na burgos e po na thyen dyert vetëm që të pajtohemi me marrëveshjet e tij. Ne i themi jo. S’kemi as tokë për të falur e as nuk kemi ndërmend ta lëmë Serbinë të kthehet”, u shpreh Haradinaj.

“Pushteti po na copëton sërish. Po na i zvogëlon trojet, po na i sjell Serbinë në Kosovë përmes Zajednicës, po na e çon Kosovën në Serbi përmes marrëveshjeve të padrejta dhe të pabarabarta. Po ia fal tokat tona Malit të Zi. Prandaj ky pushtet është i padrejtë”, theksoi nga ana tjetër Ymeri.

Pas fjalimeve të liderëve opozitarë, manifestimi mbyll pa asnjë incident, ndërkohë mësohet se policia janë vënë menjëherë në kërkim për arrestimin e deputetit Albin Kurti i cili kërkohet për hedhjen e gazit lotsjellës dhe sprejit në Kuvendin e Kosovës.

Ndërkohë, mënjehrë pas portestës, përmes një deklarate, Policia e Kosovës thënës se nuk kanë arrestuar Albin Kurtin bazuar në vlerësimet e situatës dhe me qëllim të mos eskalimit të situatës.

Sipas një komunikate të lëshuar nga tri subjektet opozitare, numri i qytetarëve në manifestimin protestues ka qenë rreth 35 mijë.

 

Furra Tahiri