Forumi Shqiptar tani për tani mbetet në Qeveri, edhe përkundër mospajtimeve për disa vendime, tha ministri i Administratës Publike në Qeverinë e Malit të Zi Marash Dukaj në emisionin “Referat” të televizionit, Gradska.
Ai tha se me miratimin e Ligjit të ri për qeverisje lokale, i cili pritet së shpejti, administrata publike do të depolitizohet.
Dukaj theksoi se Mali i Zi është vendi më i centralizuar në Ballkanin Perëndimor. Sipas tij, Ligji i ri për qeverisje lokale është në fazën përfundimtare dhe theksoi se për këtë ligj do të kërkojë mendimin e Komisionit Evropian.
Duke folur për raportin e Komisionit Evropian për integrime në BE, Dukaj pret që ai të jetë shumë më i mirë se ai i mëparshmi.
