Festë e madhe  në Dukagjin  postuar: 28.04.2008

Sofra e shtruar për ditët e vëllazërisë

Artistët të vjetër dhe të rinj të Shoqatës së vëllazërisë Kosovë-Malësi e Tuzit “Martin Dreshaj” veshur me kostumet e bukura kombëtare shqiptare kanë ngjallur simpatinë dhe respektin rrugëve të Pejës, duke un përcjellë me përshëndetjet dhe urimet e qytetarëve të Pejës. “Zëri i vëllazërisë” ka disa vjet që sjell kujtimet e miqësisë dhe vëllazërisë së krijuar gjatë luftës dhe katrahurave kur dyert dhe zemrat e Malësisë ishin hapur për mija refugjatë nga Peja dhe Dukagjini
 

“Zëri i Vëllazërisë”, ditët e takimeve mes vëllezërve nga Kosova dhe Malësia e Tuzit janë hapur ditën e premte me defilimin artistik rrugëve të Pejës. Artistët të vjetër dhe të rinj të Shoqatës së vëllazërisë Kosovë-Malësi e Tuzit “Martin Dreshaj” veshur me kostumet e bukura kombëtare shqiptare kanë ngjallur simpatinë dhe respektin rrugëve të Pejës, duke un përcjellë me përshëndetjet dhe urimet e qytetarëve të Pejës. “Zëri i vëllazërisë” ka disa vjet që sjell kujtimet e miqësisë dhe vëllazërisë së krijuar gjatë luftës dhe katrahurave kur dyert dhe zemrat e Malësisë ishin hapur për mija refugjatë nga Peja dhe Dukagjini. Këtë vit me praninë e tyre në Pejë janë paraqitur shoqëria kulturo artistike “Shqiponja” që tubon artistë nga të gjitha shoqëritë mbledhur në një vend për të përfaqësuar Malësinë me koloritin e këngëve, valleve dhe veshjeve të bukura të Malësisë.

Shtjefën Ivezaj kryetar i muzeut etnografik të Malësisë, që kishte ardhur bashkë me këtë rinj nëpër Pejë tha se kjo vizitë i ngjall emocione të veçanta. “E përjetoj me shumë emocion këtë ditë sepse jemi në Kosovën e pavarur dhe ua urojmë këtë ditë të gjithëve. E falënderoj shoqatën “Martin Dreshaj që ia kanë filluar këtij aktiviteti, na kanë ftuar por edhe kanë ardhur te ne” tha Ivezaj, pasi kishin bërë nderimet para bustit të Shkëlzen Haradinajt dhe 117 dëshmorëve të Pejës dhe Shtatores së patriotit pejan Haxhi Zeka. Para aktiviteteve tjera zyrtare të manifestimit kanë kaluar në këmbë shoqëruar me muzikë, këngë e vallë, veshur në veshje kombëtare, nga Qendra e Qytetit deri të ish Shtëpia e Mallrave dhe anasjelltas. Sali Lukaj, aktivist i shoqatës “Martin Dreshaj” që organizon këtë manifestim tha se është aktivitet në vazhdimësi të atyre që kemi mbajtur në vitet e kaluara për mbajtjen e vëllazërisë mes shqiptarëve të të gjitha trojeve

Pas kuruarave me lule te dëshmorët, rreth 40 mysafirë artistë dhe personalitete nga Malësia, janë pritur në zyrën e kryetarit të komunës Ali Berisha. Ditët kur ju vini në Pejë janë ditët më të veçanta për ne. Ajo pjesë e popullit shqiptar në atë e konsiderojmë si balli i kombit. Populli i Pejës kurrë nuk do ta harrojë mikpritjen që i është bërë në ditët më të vështira, tha kryetari Berisha. Këto lidhje me Kosovën na ndihmojnë t’i bëjmë ballë asimilimit në Mal të Zi, tha Engjëll Gojçaj, nga delegacioni i malësorëve. Në takimin me kryetarin kanë përshëndetur në emër të Malësisë së Plavës dhe Gucisë Naim Prelvukaj dhe Rexhep Abazi nga Presheva. Pasdite mysafirët kanë vizituar Gllogjanin, kompleksin e dëshmorëve dhe familjen Haradinaj.
 

Kulla, kujtesa për Jeton Dedushajn dhe dëshmorët tjerë të kombit
 

Ishte shumë domethënëse vizita e pjesëmarrësve të Manifestimit në Gllogjanin e historisë.  Malësorët dhe pjesëmarrësit tjerë të Manifestimit  janë përkulur para kujtimit për epopetë e shumta të luftës së madhe të UÇK-së në këtë pjesë të Kosovës. Baca Idriz, babai i dëshmorit nga Vuthajt e Malësisë , po ndjehej sot edhe më krenar . Ai bashklë me Hilimin e Haradinajve po kujtonin   momentet e historisë dhe të luftës së madhe çlirimtare të bijve më të mirë të trojeve etnike. Mes varreve të dëshmorëve ishte edhe ai i malësorit shtathedhur  Jeton Dedushaj. Pas kësaj ceremonie të lartësimit të kujtimit për dëshmorët, në kullën e Bacës Hilimi malësorët dhe Shoqata e Vëllazërisë Kosovë- Malësi e Madhe “Martin Dreshaj” po kuvendonin lirshëm duke shpalosur momente nga epopetë e popullit tonë në përpjekjet për liri. Në këtë frymëzim atdhetar janë kthyer pjesëmarrësit e Manifestimit duke shpalosur në ambientet e restorantit “Vëllezërit Lukaj” një program kulminat artistik. Ansamblet “ Shqiponjat” nga Malësia e Madhe, ai “Shpëtimi” nga Medvegja,  ansambli Autokton “ Rugova” bashkë me atë “Selman Kadria” nga Burimi, me këngëtarët  Mëhill Krasniqi, Rifat  Berisha,  Azem Lukaj, Ismet Demaj, Enver Lukaj e kanë ndihmuar Ansamblin “Shqiponja” të Malësisë së Madhe që të prezantohet në mënyrë kulminante në këtë festë të këngës e valles. Anton Pllumaj, Adriana Ujkaj, Anton Lulgjuraj, Nikolin Isufaj, Gjeto Ulaj kanë sjellë nga Malësia vlera të larta të folklorit shqiptar, i cili është ngërthyer bukur me vlerat autoktone që ka prezantuar Ansambli Autokton “ Rugova”. Malësia ka rikujtuar përmes aktorëve nga atje edhe aksionin famëkeq të policisë malazeze  të arrestimit, prangosjes dhe dhunës së ushtruar ndaj shqiptarëve nga organet e sigurimit malazez. Manifestimi ka shpërblyer kësaj radhe talentët Azem Lukaj e Qëndresa Jasharaj me titullin “Ec përpara me kombin” duke realizuar kështu porosinë e humanistit të ndjerë Martin Dreshaj që të përkrahen atlentët e rij në të gjitha trojet etnike.

Isniqi dhe Manifestimi

Në ditën e dytë të Manifestimit Shoqata bashkë me banorët e fshatit Isniq kishin bërë një pritje madhështore të pjesëmarrësve të Manifestimit në këtë fshat. Malësorët janë mahnitur me pamjen dhe ambientet e kullës së Osdautajve. Defilimi në rrugët e këtij fshati, nga më të mëdhenjtë në Kosovë, kënga e vallja autoktone dhe prezantimet skenike kanë bërë që edhe dita e dytë të jetë festë e madhe. Pikat artistike kanë rrjedhur bukur e shpejtë. pedagogu Rexhep Maksutaj ishte përkujdesur me nxënësit e tij aktorë që t’i përshëndes pjesëmarrësit e Manifestimit me një paraqitje të bukur skenike. Fshati Isniq pas programit artistik , ka pritur në oda pjesëmarrësit për të kuvenduar e për të qenë në një sofër me trojet etnike. Gazetari Zekë Sinanaj bashke me kryeplakun e fshatit Sali Ahmetaj  dhe me gjithë veprimtarët e fshatit po ndjeheshin krenar pse po vazhdonte Manifestimi në ditën e dytë të tij në këtë fshat. Shumë adresa e numra telefonash janë këmbyer mes trojeve etnike dhe banorëve të fshatit Isniq me porosinë që takimet e tilla vëllazërore do të vazhdojnë.

Manifestimi  i këtij prilli përfundoi bukur, madje aq bukur , sa disa filluan ta lakmojnë dhe ta shohin si moment “sfilade” për ta. Ata harronin  organizatorin dhe në vend që ta uronin për gjithë angazhimet, shpalosnin angazhimet e tyre  në vite, pa përmendur Shoqatën.
 

Rrahman Jasharaj

Në legjendë: Trojet etnike ishin bashkë në festën e madhe “ Zëri i Vëllazërisë”.