Malësia dhe trojet  tjera etnike në vallen e madhe të vëllazërisë në Dukagjin postuar: 08.04.2008

Dikur, jo shumë moti, fillimvitet në Kosovë sillnin lot, vaj, vrasje e tragjedi të rënda. Pushtuesi nuk kursente as fëmijët, as gratë e pleqtë. Vriste për ta përmbysur çdo gjë shqiptare në Kosovë. Mijëra njerëz nga Peja, Dukagjini e Kosova  kishin gjetur  strehë e dashuri vëllazërore në shtëpitë bujare të Malësisë. Atje njerëzve nga Peja, Dukagjini e Kosova u ishte kthyer buzëqeshja dhe bashkë me malësorët pritnin ditë më të mira për atdheun. Kohët ndryshuan dhe liria agoi në Kosovë. Njerëzit e mirë nga trojet etnike vendosen në një kuvend të madh që të ngritin ura vëllazërore e të jenë bashkë në këngë, valle e gëzime. U  krijua kështu me forca e vullnet të përbashkët  të Malësisë,  Pejës , Dukagjinit e trojeve tjera etnike Manifestimi “Zëri i Vëllazërisë”, që tani e sa vite po shpalos arritje të larta kulturore të trojeve tona etnike.  Treguan arritje të larta në këtë Manifestim Hoti, Gruda, Pava, Gucia, Dacajt, Medvegja, Burimi, Peja, Klina, Deçani dhe e tërë Kosova.  Kështu tani e gjithmonë muaji prill nuk vjen më me lot, po me këngën e vallen e përbashkët të vëllezërve. Kështu do të jetë edhe në këtë prill. Shoqata e Vëllazërisë Kosovë- Malësi e Madhe “Martin Dreshaj”  ka bërë shumë përgatitje për Manifestimin “Zëri i vëllazërisë 2008”. Nga Malësia do të jenë në Pejë e Dukagjin  Ansambli  “Shqiponja” që kultivon e ruan  këngën, vallen dhe traditat e kulluara shqiptare të Malësisë së Madhe . Deklarimi i përgjegjësit të këtij ansambli, z. Engjël Gojçaj, dhe të nënkryetarit të Shoqatës sonë, Pal Dreshaj , se “Shqiponja”  do të jetë pjesë e Manifestimit në Pejë e Dukagjin është pritur me entuziazëm nga Këshilli organizativ i Shoqatës dhe nga banorët e fshatit Isniq, i cili do të jetë mikpritës i pjesëmarrësve të Manifestimit në ditën e dytë. Ajo që e veçon këtë Manifestim  sivjet është se malësorët do të jenë në një valle, në një këngë e në një sofër me banorët e këtij fshati, që është nga më të mëdhenjtë në Dukagjin dhe që ka një histori të lashtë e një trashëgimi me vlera të larta. Kullat e renovuara dhe muzeu  janë dëshmi e lashtësisë dhe qëndresës së këtij  trualli shqiptar.  Ukshin Jashari, kryetar i Shoqatës së  Vëllazërisë  Kosovë- Malësi e Madhe “Martin Dreshaj”, shprehet krenar pse në këtë Manifestim edhe këtë vit do të jenë bashkë  vëllezërit nga  Hoti e Gruda, Plava, Gucia, Dacajt, Kosova Lindore dhe nga trojet tjera etnike. “ Bashkë në këngë e valle. Bashkë në biseda vëllazërore. Bashkë në pjesë të bukura të Dukagjinit. Ky është edhe qëllimi i Manifestimit Tradicional “Zëri i Vëllazërisë. Ardhja e “Shqiponjave” nga Malësia  na jep shpresa të mëdha se këto takime do të prezantojnë vlera të larta kulturore. Do të nisim bashkë me parakalimin nëpër rrugët kryesore të Pejës për të shpalosur veshjet kombëtare të trojeve etnike. Do të vazhdojmë në Sheshin “Shkëlzen Haradinaj” me këngë e valle të përbashkëta nga këto troje. Do të jemi bashkë me miqtë e Shoqatës e me pjesëmarrësit e Manifestimit edhe në mbrëmjen e parë të takimeve me një program të bukur e të pasur artistik. Do të prezantojmë edhe librin analitik të gazetares e intelektuales nga malësia, Xhoana Perkaj. Me një program të përbashkët e të  pasur artistik  Malësia dhe Dukagjini do të prezantohen edhe në ditën e dytë në  fshatin Isniq, i cili ka 700 shtëpi . Do të shkojmë bashkë edhe në Gllogjan të familja Haradinaj për të shprehur urimet tona për kthimin triumfal të Ramushit. Do të jemi edhe në Prekaz për të nderuar dëshmorët e kombit. Do të kalojmë bukur në këtë prill të lirisë në Dukagjin.  Kërkoj që tani falje nga pjesëmarrësit nëse tryezat do të jenë, ndoshta, jo shumë të mbushura , por  Malësi e dashur JU premtojmë se zemrat tona do të jenë plot  dashuri vëllazërore për Malësorët.  Jemi vëllezër të një gjaku dhe të tillë do të mbesim sot e gjithmonë. Malësi eja në Dukagjin në Manifestimin e prillit që të vëmë bashkë edhe ndonjë gur të fortë në urën që bashkon vëllezërit kudo që janë ata”,  shprehet për Manifestimin kryetari i Shoqatës Ukshin Jashari.  Fotografitë e shumta, xhirimet, shkrimet dhe libri i botuar “Zemër e madhe në Malësi” dëshmojnë sa bukur ishte në Manifestimet e kaluara në Dukagjin. Bukur do të jetë edhe këtë vit dhe çdo vit tjetër.

Këshilli Organizativ i Manifestimit uron që në këtë festë të madhe artistike të jenë, krahas familjeve të nderuara Dreshaj,  edhe shumë malësorë nga Malësia e Madhe dhe nga SHBA-ja e vendet tjera të botës.

Këto foto ruajnë për bukuri kujtimet për Manifestimet e kaluara. Bukur do të jetë edhe këtë vit dhe gjithmonë kur vëllezërit bëhen bashkë në një këngë , në një valle e një sofër.   Rrahman Jasharaj 

Manifestimi është paraparë të fillojë më 25 prill ( e premte) për të vazhduar pastaj edhe më 26 prill ( e shtune) dhe 27 prill (e diele ) .

Në ditën e parë ( 25 prill) janë paraparë këto aktivitete:
 

1. Pritja solemne e pjesëmarrësve në Manifestim ( ora 12- 13 ) ,
    
2. Parakalimi i pjesëmarrësve me veshjet tradicionale shqiptare të trojeve etnike (13- 14 )
    
3. Pritja e një delegacioni të pjesëmarrësve në kuvendin komunal nga ana e kryetarit dhe zyrtarëve të tjerë  ( 14 e 10  deri në 14 e 30 )
    
4. Komodimi i pjesëmarrësve  në ambientet  në të cilat do të qëndrojnë për 2 net e 3 ditë  dhe dreka e mikpritjes
    
5.  Shfaqja e dramës nga Teatri i Malësisë në teatrin “ Istref Begolli ( ora 16 ),
    
6. Shëtitje në mënyrë të organizuar në disa pjesë interesante të qytetit dhe takimi spontan me qytetarë të Pejës e veçmas me familjarë që kanë qenë të strehuar gjatë katrahurave në Malësi ,
    
7. Promovimi i librit  “Kosova dhe Evropa” të gazetares e intelektuales  nga Malësia Xhoana Perkaj
    
8. Program i përbashkët artistik me këngë, valle, poezi  e prezantime skenike nga Malësia, Kosova Lindore , Peja e  Dukagjini. Ky program me një koktej për të 200 pjesëmarrësit e programit të mbrëmjes  së parë
    
9.  Përfundon mbrëmja e parë  me ndarjen e mirënjohjeve e shpërblimeve modeste për më të mirët në programet kulturore e  artistike

Dita e dytë e Manifestimit ( e shtune- 26 prill  )
 

1. Përgatitja dhe nisja për në komunën e Deçanit dhe defilim i shkurtër te qendra e qytetit pa penguar komunikacionin ( nga ora 9- 10) ,
    
2. Vizita te Kompleksi i varrezave të Dëshmorëve të Kombit në Gllogjanin e historisë dhe vizita në familjen e nderuar Haradinaj për të vazhduar kështu traditën e vizitave nga vitet e kaluara ( 11- 12 ) ,
    
3. Vizitë në fshatin Isniq dhe takimi dhe bashkëbisedat e banorëve të këtij fshati me malësorët  dhe pjesëmarrësit tjerë të Manifestimit ( 13 – 15 )
    
4. Vizita e përbashkët e kullave dhe monumenteve tjera të trashëgimisë sonë
    
5. Organizimi i tribunës së përbashkët  “ Kultura në trojet etnike, sfidat dhe angazhimet e përbashkëta  ( 19 – 21 ). Në kuadër të  këtij aktiviteti organizohet një koktej dhe një bashkëbisedë e lirë
    
6. Komodimi i mysafirëve  për natën e dytë  ( ora 22 ) ,

Dita e tretë ( 27 prill , e diele )
 

1. Vizitë fshatit Fierzë dhe bashkëbisedë me banorët atje ( 9-10)
    
2. Një delegacion me malësorë dhe organizatorë të Manifestimit për disa minuta vizitojnë familjen e mësuesit dhe intelektualit të ndjerë Shefqet Osmanaj për të përcjellë ngushëllimet e Malësisë
    
3. Pjesëmarrësit nga  trojet etnike në mënyrë të organizuar nisen për të vizituar Kompleksin te Familja Jashari në Prekaz
    
4. Kthimi nga  Prekazi, shkëmbimi i dhuratave  dhe përcjellja në mënyrë të organizuar e mysafirëve të Manifestimit drejt vendlindjeve të tyre

Zëdhënësi i Shoqatës, Rrahman Jasharaj

Këshilli Organizativ i Manifestimit
Kryetar: Ukshin Jashari