Grupi Parlamentar i Republikës së Kosovës, vizitë zyrtare në Malësi

Në kuadër të vizitës zyrtare në Mal të Zi, të filluar në Komunat e Plavës dhe Gucisë, Grupi Parlamentar i Republikës së Kosovës, gjegjësisht Komisioni për Administratë Publike, Qeverisje Lokale dhe Media, i Kuvendit të Kosovës, i përbërë nga Nait Hasani kryetarë i komisionit, pastaj deputetët Rasim Selmanaj,Valon Ramadani, Fisnik Ismaili, Arban Abrashi, Ismet Rrahmani, Milaim Zeka, Albert Kinolli si dhe koordinatoret e Komisionit Drita Morina, Mirjeta Heta dhe Kimete Cimili, delegacion ky i përbërë nga deputetët e të gjitha partive parlamentare në Kosovë, vizituan edhe Malësinë.

Gjatë vizitës zyrtare në Tuz, ata u pritën nga Kryetari i Komunës së Tuzit, Abedin Axhoviq dhe kryetari i Kuvendit Fadil Kajoshaj, me bashkëpunëtorë.

Përpos zyrtarëve në Tuz, ata patën takime edhe me Kreun e Lidhjes Demokratike Shqiptare në Plavë Guci dhe në Malësi.

Siç u theksua qëllimi i kësaj  vizitë kishte të bënte me shkëmbimin e përvojave lidhur me disa ligje, por edhe për të dëgjuar vlerësimet për progresin e Malit të Zi.

Në të njëjtën kohë, parlamentarët kosovarë i kishin vënë vetes për qëllim që, nga dora e parë, të njihen me hallet e shqiptarëve në MZ.

Gjatë takimeve apostrofuan mundësitë e bashkëpunimit në të ardhmen dhe ndihmesën që Kosova mund t’ia ofrojë popullit shqiptar në Malin e Zi, sidomos në lëmin e arsimit dhe të kulturës.

Delegacioni kosovar u shpreh se Tuzi është një pikë e veçantë e interesimit të Kosovës për bashkëpunim, për shkak të marrëdhënieve të mira me Malin e Zi, por veçanërisht me raportet e mira me shqiptarët që jetojnë në këtë komunë, duke theksuar se besojnë se Tuzi, do të jenë edhe në të ardhmen pikë e forcimit të bashkëpunimit.

Nga biseda që u zhvillua në Tuz, parlamentarët kosovarë shprehen gatishmëri që të gjitha kërkesat tona t’i prezantojnë në Kuvendin dhe Qeverinë e Kosovës, por kërkuan dhe nga zyrtarët e komunës që të bëjnë kërkesa më të mëdha, që shqiptarët të punësohen më shumë në administratë shtetërore, sidomos në pika kufitare, ku pothuajse nuk ka asnjë shqiptar.

Po ashtu u fol edhe për ndërtimin e rrugës lidhëse Plavë-Deçan, në pjesën e Malit të Zi, pasi që siguruan se nga ana e Kosovës kjo rrugë do të përfundoj brenda dy viteve. / Albert Camaj /

 

Lexoni postimin e deputetit të Vetëvendosjes Fisnik Ismaili në FB:
Me kolegët deputetë të Komisionit për Administratë Lokale dhe Media, po i kalojmë disa ditë në Mal të Zi. Para se me i vizitue deputetët dhe zyrtarët e qeverisë së Podgoricës për çashtjet e Ligjit për Prishtinën, i kaluem dy ditë në Plavë, Guci e Tuz edhe mësuem shumë për shqiptarët e këtij rajoni.Që kanë probleme, e kemi dijtë gjithmonë. Por pakkush është në dijeni se janë kaq të theksueme, posaçërisht shpërngulja masive e shqiptarëve nga ato troje. Mësuem se duhet me e shtye çështjen e pikës kufitare dhe rrugës që e lidhë Malësinë me Deçanin.

Poashtu u njoftuem me një projekt ide që kish me e lidhë masivin e Bjeshkëve të Nemuna në tri shtetet, që kish me i ngjallë Rugovën, Malësinë, Thethin e Valbonën, në një resort fenomenal turistik të përbashkët. Duhet shty të tri qeveritë shuuuuumë për vullnet e realizim të këtij projekti.

Sot u diskutie edhe Ligji për RTK-në nga pikëvështrimi i drejtoreshës së RTCG (Radio Televizioni i Malit të Zi) edhe hapësira që iu jepet shqiptarëve në televizionin e këtushëm publik.

Falënderim të veçantë të gjithë njerëzve të mirë që na pritën aq mirë në Plavë, Guci e Tuz, dhe Ambasadorit Skender Durmishi, që na mirëpriti gjatë këtij udhëtimi (foto në Ambasadë) .

Mbas kësaj, pritet që Ligji për Prishtinën me u procedue tutje, bashkë me Ligjin për RTK-në, edhe shumë, shumë punë e vullnet për realizimin e rrugës Plavë-Deçan.

 

 
 
Furra Tahiri