Kuqezinjtë triumfuan në Moldavi me rezultatin e thellë 0-4 në një ndeshje të cilën e dominuan totalisht dhe mund ta kishin fituar edhe me 5 apo 6 gola diferencë.
Ishte një fitore rekordesh pasi ishte më e thella e arritur ndonjëherë nga Shqipëria në transfertë por sfida e parë zyrtare në të cilën kuqezinjtë kanë arritur të shënojnë 4 gola jashtë fushe. Që Shqipëria e kishte hedhur pas krahëve humbjen ndaj Turqisë kjo u kuptua që në fillim, me skuadrën e Rejas që ishte e orientuar drejt sulmit dhe që nuk u vë asnjëherë në vështirësi nga Moldavia.
Në minutën e 22-të Sokol Cikalleshi konfirmoi momentin pozitiv që po kalon duke realizuar golin e tij të 4-t në këto eliminatore me kuqezinjtë, me bomberin kavajas që është kthyer në një pikë referimi në sulm që nga momenti që drejtimin e kombëtares e ka marrë 74-vjeçari italian.
Një gol tipik prej sulmuesi ai i Cikalleshit që edhe në ndeshjen e parë ndaj Moldavisë ishte ai që zhbllokoi shifrat. Sfida e Kishinievit ishte fatsjëllse edhe për Keidi Baren që në minutën e 34-t përfitoi nga një gafë e rëndë e portierit vendas për të gjetur golin e tij të parë me kuqezinjtë.
Por nuk mbaroi këtu pasi në pjesën e parë kishte vend edhe për golin e parë të Lorenc Trashit me kombëtaren. Një debutim ëndrrash ky për mesfushorin e Partizanit që në minutën e 40-të shënoi një gol të bukur nga një pozicion i prirët nga jashtë zone në krahun e majtë të sulmit.
Edhe fraksioni i dytë i lojës foli totalisht kombëtaren tonë që mund të kishte gjetur golin e 4-t me Keidi Baren por traversa i tha jo mesfushorit fierak. Në minutën e 89-të kishte vend edhe për debutimin e dy talenteve kuqezi Marash Kumbullës dhe Lindon Selahit të cilët me këto pak minuta që luajtën ndaj Moldavisë do të veshin përgjithmonë fanellën kuqezi çfarëdo që të ndodhë me karrierën e tyre.
Hyrja e dy të rinjëve i solli fat Rey Manajt që përfitoi nga një asist perfekt pas një shpërthimi të Roshit në të djathë të sulmit duke realizuar me finte një gol spektakolar për shifrat finale 0-4. Me këtë gol Manaj shleu të gjitha gabimet për rastet e humbura në ndeshjen ndaj Turqisë.
Në shtesë Roshi kishte mundësinë ideale t’i çonte në 0-5 shifrat por gaboi përballë portierit moldav Coselev. Me këtë fitore Shqipëria u ngjit në kuotën e 12 pikëve dhe një sukses ndaj Andorrës modeste në ndeshjen e ardhshme do të vendoste një rekord përsa i përket pikëve të grumbulluar ndonjëherë në një fushatë eliminatore.
Kosova fiton Malin e Zi 2:0
Kosova mban gjallë ëndrrën për t’u kualifikuar në Euro 2020 nëpërmjet eliminatoreve pasi ka edhe një tjetër mundësi në rast se nuk ja del në play-offin e Nations League.
Dominim total dhe një fitore e pastër 2-0 e dardanëve ndaj Malit të Zi në një “Fadil Vokrri” të tejmbushur nga tifozët kosovarë.
Kosova e nisi me marshin e 5-të ndeshjen dhe pas disa rasteve të humbura arriti të zhbllokonte shifrat me Amir Rrahmanin që në minutën e 10-të. Kapiteni i Kosovës përfitoi nga një dalje jo e studiuar e portierit malazez dhe me një goditje të saktë me kokë e dërgoi topin në fundin e rrjetës.
Dyfishimi i dardanëve erdhi në minutën e 34-t me të përhershmin Vedat Muriqi i cili me goditjen e dytë finalizoi një një aksion perfekt të vendasve duke i dhënë goditjen përfundimtare Malit të Zi.
Në të njëtin minutë Shqipëria shënonte në Moldavi gjithashtu golin e avantazhit të dyfishtë, rastësi e fatit apo jo por në të 34-ën kishte festë si për kuqezinjtë ashtu edhe për dardanët.
Në pjesën e dytë Rashica me shokë humbën një mori me raste ndërsa edhe Muriç u tregua në lartësinë e duhur kur u thërrit në detyrë.