Kultura shqiptare ka humbur artistin, Malësia e Madhe rapsodin, shokët dhe miqtë e Saliut njeriun e mirë dhe familja të dashurin e zemrës.
Më 29 dhjetor vdiq nga një sëmundje e rëndë rapsodi i njohur Sali Mani. Ai ishte 65 vjeç.
Sali Mani ishte autori dhe interpretuesi me çifteli i këngëve popullore, ai i këndoi për disa dekada Malësisë, bukurive mahnitëse të kësaj krahine, patriotizmit të shqiptarëve dhe lirisë së Kosovës.
Sali Mani e filloi aktivitetin artistik në vendlindjen e tij, Reç, pastaj e vazhdoi atë në Kelmend, Dukagjin dhe Koplik, ku u bë i njohur si artist i merituar. Ai mori pjesë në shumë aktivitete artistike lokale dhe kombëtare, duke e përfaqësar me dinjitet folklorin e krahinës së Malësisë.
Pas rënies së komunizimit në Shqipëri, në vitet ’90, Sali Mani emigroi me familjen: gruan, vajzën dhe dy djemtë, në Shtetet e Bashkuara. Edhe gjatë viteve që jetoi në emigracion ai mbeti një njeri shumë aktiv dhe patriot, që ja kushtoi artin e tij komunitetit të shqiptarëve të Michiganit. /VOA/
nga Halit Bogaj
Më 29 dhjetor të vitit që lamë pas , në Detroit të SHBA-ve, vdiq rapsodi ynë i madh Sali Mani, me emrin e të cilit është e lidhur një periudhë e gjatë kohore e këngës dhe muzikës madhështore shqiptare.Rapsodi Sali Mani me këngët e tij të ëmbla ishte përherë prezent në Kosovë.Edhe atëherë kur e kishim të ndaluar dhe shkohej në burg edhe për një këngë të dëgjuar nga Shqipëria,me vite të tëra ishim mësuar ta përjetonim zërin e rapsodit tonë të dashur Sali Mani, i cili në mënyrë të njejtë dhe me dashuri shumë të madhe këndonte për të gjithë bashkëatdhetarët e tij jashtë atdheut.Ai kishte hyrë në zemrat tona dhe ishte bërë përherë pjesë e pandarë e tyre, duke mbetur njëri ndër personalitetet më të çmuara të artit të bukur muzikor.Kur Ansambli shtetëror i këngëve dhe valleve popullore shqipe vinte për vizitë në Kosovë, një vend nderi i përkiste edhe Sali Manit , kënga e të cilit e ndezte flakë çdo zemër shqiptare të këtij nënqielli.
Të gjithë e dimë se me çfarë pasioni të thellë i këndonte dy këngët e tij kushtuar Kosovës’’Moj e mira e bregut t’Cemit’’dhe’’Oj Kosovë hej tungjatëjeta’’të cilat me fuqinë e tyre të brendshme dhe aftësinë interpretuese të këngëtarit tonë të mirënjohur na përvetësuan për jetë dhe na mallëngjejnë sa herë i dëgjojmë. /Portali Zemra Shqiptare/
Amaneti i Sali Manit para vdekjës së tijë:
Dua zemrën ta qetsoj, dua shpirtin ta pushoj, kta t’dy eshtën dua me i lanë në Shqipëri në tokën nënë.
..dhe u vorrua në Boriq të madh, Koplik – Malësia e Madhe.
Me këtë rast të vorrimit ndjerit Sali Mani kanë ardhur enkas nga Amerika edhe një grup malësorësh si Dedë Dedvukaj, Kolë Gojçaj, Kolë dhe Hanë Nikprelaj dhe Luigj Gjokaj.