Dymbëdhjetë vite më parë, saktësisht me 14 Shtator të vitit 2000 në Tuz të Malësisë nisi punën portali Malesia.Org.
Qëllimi i misionit tonë ishte që Malësia të ketë një portal, një dritare të vet në internet, një vend në të cilin gjendja në Malësi të paraqitet ashtu si është, ku fjala e lirë të jetë në vend të parë. Ky dhe ishte qëllimi kryesorë, gjë që deri diku dhe ja kemi arritur.
Gjatë këtyre dymbëdhjetë viteve u përpoqëm që lajmet e ngjarjet e përditshme, aktivitetet kombëtare e kulturore dhe tjera aktivitete nga Malësia t’i paraqesim sa më saktë dhe shpejt. Po ashtu edhe aktivitetet e diasporës tonë e cila numëron më shumë se gjysma e Malësisë. Në këtë mënyre diaspora ishte më afër Malësisë dhe anasjelltas por edhe Shqipëria, Kosova dhe trevat tjera shqiptare të jenë më pranë realitetit në Malësi.
Në portalin tonë gjithashtu mundësuam shoqatave e organizatave të profileve të ndryshme, subjekteve politike, individëve e gazetarëve të paraqesin shkrimet, opinionet e kumtesat e tyre, që jo domosdoshmërish paraqesin këndvështrimin tonë.
Po ashtu me përkushtim të veçantë kontribuam në ruajtjen e traditës, kulturës dhe gjuhës shqipe në trevat shqiptare në Mal të Zi e posaçërisht në Malësi, dhe përkrahëm çdo iniciativë që ka këto qëllime.
Ishte një rrugë aspak e lehtë e cila kërkoi kohë, vullnet, guxim dhe përkushtim të përditshëm në kushte minimale me një staf amator e vullnetarë, por i cili përpoq që punën ta kryej në nivelin profesional, shpesh duke i lënë punët e obligimet private për të ja përkushtuar kohën punës në portal.
Gjatë këtyre viteve nuk munguan lëvdatat, përkrahjet, po ashtu u ballafaquam edhe me kritika si dhe sulme, e të cilat i morëm si pjesë përcjellëse e punës që kryejmë.
Megjithatë puna jonë u shpërblye me përkrahjen e madhe të lexuesve tonë, gjë që bëri që sot Malesia.Org është ndër portalet më të njohura dhe vizituara shqiptare, me më shumë se 5000 vizita në ditë.
Punën tonë e vlerësuan edhe shumë shoqata e organizata të profileve të ndryshme si në Malësi ashtu dhe në diasporë.
Me këtë rast falënderojmë “Fondin Humanitarë Malësia” nga New York-u, i cili në 12 vjetorin e ekzistencës të portalit na dërgoj një donacion, ndihmë e cila do të shfrytëzohet për nevojat e mirëmbajtjes së portalit. Gjithashtu falënderojmë dhe “Shoqatën Dedë Gjon Luli” nga New Yorku dhe “Shoqatën Atdhetare Malësia e Madhe” nga Detroiti të cilët çdo herë ishin të gatshëm të na përkrahin moralisht dhe materialisht.
Urime 12 vjetorin me shpresën që së bashku do të festojmë edhe shumë përvjetor tjerë.
