Për shkak të mosrespektimit të marrëveshjes nga ana e partisë më të madhe qeveritare DPS-së, që kishte nënshkruar me partitë shqiptare, në lidhje me mbajtjen e referendumit për Komunën e Tuzit/Malësisë, deputeti i Forcës së Re Demokratike, Genci Nimanbegu, ka paralajmëruar mundësinë e daljes nga shumica qeveritare, shkruan gazeta Vijesti.
Nimanbegu tha se pas shtyrjes së re të referendumit për Komunën e Tuzit, partitë shqiptare duhet rishikuar marrëdhëniet me DPS-në.
Ai tha se partia e tij (Forca), pas bisedimeve që do te ketë me parterin e tyre, Iniciativën Qytetare, do te marrin qëndrimin politik në lidhje me vazhdimin apo jo në shumicën qeveritare.
Nimanbegu u shpreh i pakënaqur dhe tha se nuk do te luajnë me besimin që u kanë dhënë qytetaret.
Vasel Sinisishtaj nga Iniciativa Qytetare, tha se pas skadimit të afatit ligjor për shpalljen e referendumit, me 15 gusht, do të kërkojnë takime me ambasadorët e SHBA-ve dhe BE-së.
Ai u shpreh se situata e krijuar është një loje politike, me qellim që referendumi të zhvillohet pas zgjedhjeve lokale, ku Malësia do të mbesin edhe katër vite tjera nën Podgoricë.
Marrëveshja në mes partive shqiptare dhe DPS-së, ishte që referendumi të zhvillohet më së largu deri në fund të shtatorit të këtij viti, megjithatë tashmë të gjitha gjasat janë se kjo nuk do të ndodhin, sidomos pas dështimit të elaboratit, të porositur nga Podgorica, i cili tregon në mosqëndrueshmëri ekonomike për Komunën e Malësisë. /MALESIA.ORG/