Liderët e partive shqiptare takohen sërish në Ulqin

Platforma-shqiptaretShtatë subjektet politike shqiptare u takuan sonte (të premten) në Ulqin.

Në takimin e dytë të liderëve të këtyre subjekteve politike, temë e bisedimeve ishte nevoja për përpilimin e platformës së përbashkët.

Me ftesën e liderit të Partisë Demokratike Fatmir Gjeka, njëkohësisht Kryetar i Komunës së Ulqinit, në takim ishin të pranishëm liderët e Forcës së Re Demokratike Nazif Cungu, Unionit Demokratik të Shqiptarëve Mehmet Zenka, Lidhjes Demokratike në Mal të Zi Mehmet Bardhi, Iniciativës Qytetare Vasel Sinishtaj, Alternativës Shqiptare Gjergj Camaj dhe Lëvizjes qytetare “Perspektiva” Zana Sarvan.

Pika për të cilën është arritur konsensusi i të gjithë pjesëmarrësve të takimit është inicimi i përbashkët i ndryshimit të ligjit zgjedhor, gjegjësisht pjesës së tij e cila ka të bëj me listën zgjedhore të pakicave nacionale, mëson portali Ul-info.

Politikanët shqiptarë edhe më parë kanë shprehë pakënaqësi rreth Kodit të ri Zgjedhor i cili hyri në fuqi në vitin 2010, i cili hoqi njësinë e posaçme zgjedhore për shqiptarët i cili jepte 4 deri në 5 mandate të garantuara në Parlamentin e Malit të Zi.


Takimi i radhës është caktuar për shtatë ditë, ku do të formohet grupi punues për përpilimin e platformës të cilën do ta përbëjnë nga një përfaqësues nga çdo subjekt politik. /MALESIA.ORG/

Furra Tahiri