Sipërmarrësi nga Tuzi me origjinë nga Trieshi, Mark Gjolaj , në një ceremoni festive dhe shumë miqësore ditën e mërkurë në hapësirat e Shkollës Fillore “ Gjergj Katsrtioti– Skënderbeu” në Triesh , u ka shpërndarë 55 pako të gjithë nxënësve të kësaj çerdheje të dijes, me traditë më se 100-vjeçare.
Ky humanist zemërmirë e zemërbardhë i gëzoi zemrat e fëmijëve edhe me bredhin e Vitit të Ri me të gjitha elementet e tij zbukuruese . Përveç kësaj dhuruesi Gjolaj lumturoi pa masë të dashurit tonë- fëmijët edhe me pesë topa basketbolli e futbolli dhe me një rrjetë të basketbollit. Po ashtu ai u dhuroi 100 euro nxënësve që, për nder të këtij aktiviteti festiv e madhështor , kishin përgatitur ushqime dhe ëmbëlsira.
Qëllimi i bamirësit Mark Gjolaj ka qenë që me këto dhurata në vlerë prej më shumë se 1.000 euro, t’i gëzojë fëmijët në prag të festave të fundvitit. Ky është një gjest bujar i njeriut fisnik i cili i bëri këta fëmijë të buzëqeshin. “ Me të vërtetë është kënaqësi të jeshë në mesin e nxënësve në raste të tilla gëzimi. Buzëqeshja e tyre e ngrohtë më ofroi kënaqësi të jashtëzakonshme, të papërshkrueshme , më kënaqi zemrën dhe më ushqeu shpirtin e mendjen. Ishte ky një gëzim i përbashkët. Nxënësit i gëzova unë, kurse ata më lumturuan mua”, shprehet me emocione Gjolaj.
Kënaqësia dhe lumturia në mesin e nxënësvedhe mësimdhënësve ishin të papërmbajtshme, mbase ky ishte moment i veçantë për të gjithë ata. Gëzuar Vitin e Ri 2022 !”
Gjekë Gjonaj