Kryetari i Komunës së Tuzit, Nik Gjeloshaj, kryetari i Federatës së Futbollit të Malit të Zi, Dejan Saviqeviq dhe drejtori i KF „Deçiq” Pal Dreshaj, kanë vendosur sot gurë themelin për ndërtimin e tribunës së re të stadiumit në Tuz.
Në fazën e parë të projektit do të ndërtohet tribuna me kapacitet prej 1.080 vendesh, e cila do të përfshijë të gjitha hapësirat e nevojshme për organizimin e ndeshjeve – hapësira të reja të zhveshjes për ekipet dhe zyrtarët, dhoma ambulatore, dhoma e shtypit etj. Investim, i cili do të financohet në bashkëpunim midis dy institucioneve, Komunës së Tuzit dhe FFMZ – kap vlerën e rreth 2.5 milionë euro kurse afati i përfundimit të punimeve është 12 muaj.
Kryetari i Komunës së Tuzit, Nik Gjeloshaj, mes tjerash falënderoi Federatën e Futbollit për ndihmën në ndërtimin e tribunës.
,,Falënderojmë Federatën e futbollit të Malit të Zi për bashkëpunimin e suksesshëm të deritanishëm. Ne morëm mbështetje për këtë projekt dhe ndërtimi filloi menjëherë sapo mblodhëm të gjithë dokumentacionin e nevojshëm. Është ky një investim i përbashkët i cili ndihmon në zhvillimin e infrastrukturës së sportit të komunës sonë. Shpresoj që në të ardhmen bashkëpunimi ynë të jetë po aq i suksesshëm sa ka qenë deri më tani” tha Gjeloshaj.
,,Më vjen jashtëzakonisht mirë që pas disa pengesave administrat, ka filluar ndërtimi i tribunës së re të stadiumit të Tuzit. Shpresoj që punimet të përfundojnë në kohë dhe Tuzi të marrë një godinë moderne futbolli. Dëshira jonë është që kur të ndërtohet kjo tribunë, të vazhdojmë me projektin dhe të ndërtojmë një tribunë tjetër në këtë stadium, që këtu të luhen ndeshjet ndërkombëtare” tha Saviqeviq gjatë vendosjes së gurë themelit.
KOMUNA E TUZIT