Mali i Zi e ka njohur Kosovën sepse ndryshe do të përjetonte një dëm të madh, ka deklaruar për mediat serbe presidenti malazez Filip Vujanoviq, në prag të vizitës së tij zyrtare në Beograd.
Vujanoviq ka deklaruar për gazetën Politika se, Podgorica zyrtare ka pasur raport tejet të durueshëm dhe të përgjegjshëm ndaj pavarësisë së Kosovës – dhe ka shtuar se e kupton ndjeshmërinë e kësaj çështjeje për Serbinë.
Megjithatë, ka shtuar ai, Mali i Zi e ka njohur Kosovën sepse është dashur të kujdesej për interesat e veta. “Nuk mund të pritej që Mali i Zi të fitonte një raport pozitiv për aplikimin e tij për statusin e vendit kandidat për në BE, duke e injoruar faktin se, atëbotë, 21 vende të Bashkimit Evropian – nga 27 sosh sa janë gjithsej – e kishin njohur pavarësinë e Kosovës”, ka thënë Vujanoviq.
“Në fund, njohja nga ana jonë ka ardhur tetë muaj pas shpalljes së pavarësisë së Kosovës dhe pasi që këtë pavarësi e kishin njohur 48 shtete. Pra, e kemi njohur Kosovën atëherë kur ishte e qartë se, po te vepronim ndryshe interesat tanë integruese dhe ato të përgjithshme do të përjetonin një dëm të madh”, ka thënë Vujanoviq. /Telegrafi/