Tuz, 6 mars 2011 – Edhe pse nata finale si zakonisht, është defileu nëpër qeder të Tuzit i ekipeve i të rriturve, që këtij viti do të zhvillohet me 8 mars, Dita e Fëmijëve sigurisht ishte më e veçanta dhe më e bukura ditë e Karnavaleve “Koret”. Kjo për faktin se fëmijët janë ardhmëria jonë dhe pasuria më e madhe që ka çdo familje në Malësi.
Tuzi ishte përplot i mbushur me fëmijë të shoqëruar nga më të afërmit e tyre. Ata vërtet lulëzuan Tuzin me ngjyra të ndryshme, kostume, buzëqeshje dhe shfaqjen e programit që çdo ekip kishte përgatitur.
Këtë vit kishte më shumë vogëlush e vogëlushe, që nga mosha disa muajsh, se ndonjë herë më parë.
Në Ditën e Fëmijëve morën pjesë 12 ekipe me më shumë se 500 fëmijë. Vërtet se të gjithë ishin të mrekullueshëm, me tema, maska dhe kostume të veçanta të cilët interpretuan në mënyrë artistike krijimin e tyre.
Defilimin e hapën ata më të vegjlit, pra Lulishtja “Nëna Tereze” me temën “Udha e Shkronjave.
Ekipi i dytë i cili shfaqi programin e vet ishte ekipi “Dushiqi“ me temën “Balona“ pastaj vijojnë ekipet: “Gruda“ me temën “Rebelët“,“Tuzi“ me temën “Mbretëresha e Dëborës“,“Nënhelmi“ me temën “Vallja e Çmëndur“, Shkolla Fillore “Bashkimi“ nga Hoti me temën “Vallja e Paqes ndër Kontinente“, “Vuksanlekaj“ me temën “Duke bërë gara“, “Dinosha“ me temën “Një ditë e lumtur“, Shkolla Fillore nga Tuzi me temën “Fëmijët përqafojnë Botën“,Shkolla Fillore nga Sukruqi me temën e futbollit “Vaka Vaka“, “Vulajt“ me temën “Parlamenti i Fëmijëve“ dhe ekipi “Trieshi“ me temën “Magjistari i Ozit“.
Vendin e parë, edhe pse të gjithë ishin të parët, këtij viti i takoi ekipit që për të parën herë mori pjesë, “Vulajt“, të dytin e ndanë dy ekipe, fituesi i vitit të kaluar, Lulishtja “Nëna Tereze” dhe Shkolla Fillore “Bashkimi“ nga Hoti kurse vendi i tretë gjithashtu e ndanë dy ekipe, ekipi që po ashtu mori pjesë për të parën herë, “Dinosha“ dhe ekipi Shkolla Fillore nga Tuzi.
Urojmë të gjithë fëmijëve të kalojnë një femëri të shëndoshë me plotë gëzim e të rritën të lumtur pranë të afërmve të tyre. Të gjithë jeni fitues! /Malesia.Org/