Tuz – Malësi (10.06.2013)- Këshilli ligjdhënës i Kuvendit të Malit të Zi, ka shtyre për seancën e ardhshme shqyrtimin e propozimit për ndërrimin e ligjit të organizimit territorial, i cili parasheh dhënien e Komunës për Malësinë.
Propozimi ishte dorëzuar nga deputeti i Forcës, Genci Nimanbegu.
Anëtarët e Këshillit u përgjigjën se propozimi nuk është në përputhje me rregulloren.
Deputeti i DPS-së, Luigj Shkrela, tha se Tuzi ka paraqitur Kryeqytetit (Podgoricës) iniciativën për punimin elaboratit të arsyetshmerisë, dhe se elaborati do të përfundohet deri në fund të qershorit.
Shkrela po ashtu tha: “të pritet së pari të punohet elaborati, dhe pastaj do të flitet për këtë çështje”, në çka reagoi deputeti Nimanbegu.
“Thuaj pse jeni kundër, mos krijoni arsye”, tha Nimanbegu.
Shkrela ju përgjigj: “Nuk jeni në gjendje të punoni elaboratin, por kërkoni komunën”.
Shkrela kritikoi Nimanbegun edhe në lidhje me emërtimin, Tuz – Malësi.
“Erdhe me propozim e nuk dinë a do të quhet komuna Tuz apo Malësi. Pra nuk di, sepse ke frikë të thuash”, tha Shkrela.
Nimanbegu tha që bëhet fjalë për emër historik dhe ai nuk e ndërron thelbin e ligjit. “Le të vendosin vet a do të quhet komuna Malësi apo Tuz. Kjo aspak nuk futet në thelbin e ligjit”, tha ai.
Pati vërejtje edhe për studimin e qëndrueshmërisë ekonomike të komunës së re, të cilën e refuzoi Kuvendi komunal i Podgoricës.
“Elaborati është krejtësisht i justifikueshëm. Është shumë më cilësor se elaborati i komunës së Petnicës”, tha Nimanbegu dhe theksoi “qëndron mbas versionit të ofruar deri sa ti largojë të gjitha dyshimet që DPS qëndron mbas pavarësisë së komunës Tuz-Malësi”.
Shkrela tha që ndjehet i ofenduar për mosbesimin ndaj DPS-së. “Nuk i beson DPS-së? Kujt nuk i beson? Pse je pjesë e pushtetit nëse nuk beson”, i tha Shkrela Nimanbegut. /MALESIA.ORG/