Prishtinë, 30 korrik – Mali i Zi ka hapur ambasadën e vet në Kosovë. Ministri i Punëve të Jashtme, Enver Hoxhaj, ka pritur Radovan Milaniqin, i cili ka dorëzuar letrat e emërimit në pozitën e të ngarkuarit me punë në Ambasadën e Malit të Zi në Kosovë.
“Gjatë takimit, ministri Hoxhaj ka vlerësuar bashkëpunimin bilateral ndërmjet dy shteteve, duke shprehur vullnetin e Republikës së Kosovës për fuqizimin e këtyre marrëdhënieve me Malin e Zi në shumë fusha”, thuhet në një njoftim të MPJ-së.
Hoxhaj ka bërë të ditur se së shpejti edhe Kosova do të caktojë përfaqësuesin e saj diplomatik në Mal të Zi, duke e vlerësuar shumë të rëndësishëm për marrëdhëniet ndërmjet dy vendeve fqinje, funksionalizimin e misioneve diplomatike në dy kryeqytetet.
Milaniq ka shprehur përkushtimin e tij që gjatë punës në Kosovë, do të jetë në shërbim të fuqizimit të marrëdhënieve dhe shkëmbimeve të gjithanshme ndërmjet dy shteteve. /BW/ – /MALESIA.ORG/