Tabolidi kroat “Index.hr” ka publikuar një shkrim të gjatë për katër këngëtaret shqiptare të cilat po shkelqejnë në botën e muzikës në botë: Rita Orën, Bebe Rexhën, Dua Lipën dhe Era Istrefin.
Shkrimi, i cili ka karakter të fuqishëm afirmativ, shtron pyetjen se si arritën këto këngëtare shqiptare në maja kaq të larta të skenës muzikore në botë.
Çfarë kanë shqiptarët dhe kosovarët që po çmendin botën. Para disa viteve bota pak dinte për shqiptarët, e kur flasim për amerikanët ata kanë njohur shqiptarët dhe kosovarët vetëm përmes vëllezërve Belushi, Eliza Dushkut apo reperit Action Bronson.
“Shtrohet pyetja prej nga ky interes kaq i madh i industrisë muzikore amerikane për këngëtaret nga Kosova dhe se a ekziston ndonjë sekret”, pyet autori i shkrimit.
Por, ai i heq të gjitha dyshimet se ato mund t’i kishin prekur këto maja me dukjen e tyre fizike dhe me paraqitjen e tyre në skenë.
“…për një karrierë të suksesshme nuk mjafton vetëm t’i zbulosh gjinjtë. Nuk ka dyshim se dukja e jashtme ndihmon, por në qoftë se përpiqeni të depërtoni në skenën në të cilën të gjithë gjinjtë duken pakashumë fantastikë, nuk do t’ju bëjnë punë mënyrat klasike ballkanase të promovimit”, shkruan Index.hr.
Tabloidi e ka edhe përgjigjen e pyetjes prej nga ky sukses i katër këngëtareve të reja shqiptare. Ai vë në spikamë kulturën e talentin, por edhe bukurinë e këngëtareve dhe në mënyrën si funksionon industria muzikore.
“Përgjigja qëndron pjesërisht në kulturën muzikore, në bukurinë ekzotike, por edhe në talentin e padiskutueshëm dhe në mënyrën e funksionimit të industrisë muzikore”, shkruan Index.hr.
Në fund, tabloidi thekson se Rita Ora, Bebe Rexha, Era Istrefi e Dua Lipa, ndonëse janë vetëm në fillim të rrugës së famës, Shqipërisë e Kosovës tashmë i kanë bërë vend “në hartën botërore të muzikës”
“Është e sigurt se koha e këtyre këngëtareve është duke ardhur dhe se ato, pavarësisht se ka apo nuk ka kjo lidhje me prejardhjen e tyre, Shqipërisë dhe Kosovës përfundimisht i kanë bërë vend në hartën botërore të muzikës”, përfundon Index.hr.
Tabolidi ka bërë nga një profil për secilën prej këtyre këngëtareve, duke i krahasuar me këngëtaret më të famshme të muzikës pop në botë. Profili shoqërohet me fotografi dhe me spotet muzikore të katër këngëtareve shqiptare.