Miratohet mes tensionesh ligji që zyrtarizon gjuhen shqipe në Maqedoni

Shqipja bëhet gjuhë zyrtare në Maqedoni. Në një seancë të tensionuar Parlamenti Maqedonas miratoi me 64 vota pro ligjin për përdorimin e gjuhëve i cili zyrtarizon përdorimin e gjuhës shqipe në nivelin lokal dhe qëndror.

Kryeparlamentari Talat Xhaferi u përcolli urimet shqiptareve të Maqedonisë në rrjetin social facebook, ndërsa deputeti i BDI-së, Artan Grubi e cilësoi këtë një ditë të jashtëzakonshme për shqiptarët.

Parlamenti i Maqedonisë e kishte miratuar këtë ligj që në muajin janar me 69 vota, por ai nuk u dekretua nga presidenti Ivanov dhe kjo bëri që ligji të dërgohet për herë të tretë në Parlament.

Miratimi i ligjit për përdorimin e gjuhëve, shihet si një përmbyllje e Marrëveshjes së Ohrit që u arrit në vitin 2001 duke i dhënë fund konfliktit të armatosur mes forcave qeveritare dhe kryengritësve shqiptarë që kërkonin më shumë të drejta në Maqedoni.

Mbi bazë të ligjit të gjitha organet e pushtetit qendror, institucionet qendrore, ndërmarrjet publike, agjencitë, drejtoritë, institucionet dhe organizatat, komisionet e personat juridikë qe ushtrojnë autorizime publike, krahas gjuhës maqedonase do të përdorin edhe gjuhen e përdorur nga 20% e qytetarëve, shqipen. Ligji u miratua mes tensioneve që përshkallëzuan edhe në dhunë mes ish-kryeministrit Nikolla Gruevski dhe kryetarit të parlamentit Talat Xhaferi.

Shpërfillja e 35 mijë amendamenteve të propozuara nga partia opozitare, VMRO-DPMNE bëri që deputeti dhe ish-kryeministri i Maqedonisë, Nikolla Gruevski, të përpiqej të pengonte votimin. Por përballë kundërshtisë së Xhaferit për të ndërprerë seancën ai e sulmoi verbalisht atë, duke e lagur edhe me një gote ujë.