‘’Unioni i Bashkive dhe Komunave Shqiptare’’ bashkon shqiptarët e rajonit me perspektivat e përbashkëta zhvilluese.
‘’Unioni i Bashkive dhe Komunave Shqiptare në Rajon’’ u mblodh ditën e djeshme në ambientet e Bashkisë së Tiranës, për të diskutuar dhe ndërtuar strategjinë e përbashkët për bashkëveprim dhe bashkëpunim mes bashkive kryesore të hapësirës shqiptare. Të pranishëm ishin shefat e kabineteve të bashkive më të mëdha shqiptare; të Shqipërisë, Maqedonisë së Veriut, Kosovës, Malit të Zi dhe Serbisë , nën kujdesin e Shefes se Kabinetit të Bashkisë së Tiranës znj.Keti Luarasi si dhe në drejtimin e drejtoreshës së Sekretariatit të Unionit të Bashkive dhe Komunave Shqiptare në Rajon znj. Andriola Kambo.
Kësaj herë Komunën e Tuzit përfaqësoi Drita Rukaj, këshilltare e kabinetit të kryetarit të Komunës së Tuzit.
Në këtë takim u diskutua për strategjitë dhe idetë për projektet dhe mundësitë reale përmes të cilave ky union do të ndikojë drejtpërdrejtë në cilësinë e jetës së qytetarëve në bashkitë e komunave shqiptare!
Gjatë kësaj mbledhjeje theksi u vu tek përpilimi i një plani 1-vjeçar i cili do të përmbajë kalendarin e përbashkët të projekteve në nivel lokal dhe rajonal për të kontribuuar në fushë të kulturës, sportit, trashëgimisë kulturore, turizmit, urbanistikës etj.
“Unioni i Bashkive Shqiptare në Rajon’’ do të unifikojë në veprimet e njësive vendore anëtare dhe do t’i prezantojë ato në nivel rajonal, vendor, qendror dhe ndërkombëtar.