Hapet Panairi i librit, promovohen librat e profesorëve universitarë, Berishaj dhe Vukpalaj

Në prani të shumë dashamirësve të fjalës së shkruar, përfaqësuesve të trupit diplomatik dhe zyrtarëve të komunës së Tuzit, sonte në Tuz është hapur, për herë të dytë, Panairi i Librit, i cili do të qëndrojë i hapur nga 18 deri më 20 gusht 2020, nga ora 09:00 deri në orën 12:00, dhe nga ora 18:00 deri në orën 22:00.

Panairi i Librit mbahet në kuadër të aktivitetit “Vera në Malësi”, nën kujdesin e Sekretariatit për vetëqeverisje lokale të Komunës së Tuzit.

Fjalën e rastit në emër të organizatorit e mbajti sekretarja e sekretariatit për vetëqeverisje lokale Marina Ujkaj, kurse Panairin e shpalli të hapur kryetari i komunës së Tuzit, Nik Gjeloshaj.

Në Panair marrin pjesë rreth 20 shtëpi botuese, me mbi 2000 tituj, nga vendi dhe rajoni.

Gjithashtu, kryetari i komunës, Nik Gjeloshaj ndau mirënjohje Ambasadorit të Republikës së Kosovës në Mal të Zi, Z. Ylber Hysa  për kontributin e dhënë në zhvillimin e Komunës së Tuzit.

Në kuadër të aktivitetit të kësaj mbrëmje, u bë edhe promovimi i librave “Në botën e përbashkët”, të Akademik, prof. Dr. Anton Kolë Berishaj, dhe “Fshehja e Krimit”, të Prof. Dr. Anton Vukpalaj.

Një fjalë përshëndetëse, në emër të Akademisë së shkencave dhe arteve, e mbajti Sekretaria e Seksionit të shkencave shoqërore në kuadër të Akademisë – Akademike prof. Dr.Justina Shiroka Pula, kurse për librat folën Akademik prof. Dr. Hivzi Islami dhe prof. Dr. Martin Berishaj.

Promovimin e drejtoi doktoranti Nikollë Camaj, i cili, në fjalën hyrëse, vlerësoi këtë aktivitet si rast unik, dhe bëri një vështrim të shkurtër nga biografia dhe veprimtaria e autorëve të dy librave.

“Ndihem i privilegjuar që kam rastin të moderoj këtë përurim librash, këtë aktivitet kulturor, me nivelin e të cilit, për sa i përket asaj që promovohet sonte këtu, do të krenoheshin edhe qendra botërore, e jo ma Tuzi ynë i vogël.

E them këta pa qëllim mburrjeje, por nuk besoj të ketë shumë qytete që kanë rast, që në mesin e aktiviteteve kulturore, brenda një mbrëmjeje, të promovojnë dy botime të Akademisë së shkencave, dhe që të dy autoret të jenë nga i njëjti vend, pra nga vendi ku bëhet promovimi, siç është rasti sonte, me veprat e dy Antonave tonë, në Malësi”.

Duke folur për autorët Nikollë Camaj përpos të tjerash nënvizoi:

“Anton Vukpalaj, profesorin e ri nga Sorbona, bir i këtij trualli, dhe ligjërues në Universitetin e Prishtinës, i cili më punën e vet të deritashme po ndjek shembullin e Antonit tjetër. I lindur në Malësi, para 50 viteve, ku edhe ka kryer shkollimin fillorë dhe të mesëm, në vitet e 90-ta dezertoi nga shërbimin ushtarak, sepse nuk donte të behej pjesë e gjakderdhjes që po shkaktonte kasapi i Ballkanit. Dihej fati i një dezertori, po të qëndronte në vendlindje, prandaj përmes kanaleve të ndryshme, Antoni arrin në Paris, ku nuk humb kohë por u qaset librave, dhe punën e vet e kurorëzoi me doktoraturë në Sorbonë, në vitin 2008.

Deri më tani ka botuar dhjetëra punime që lidhen me politiken e Ballkanit, të cilat janë pritur mirë nga qarqet shkencore e politike të rajonit

Anton Kole Berishaj, rrugen e suksesit fillon me ditën e parë të shkollës, në Priftnin e tij, ku është lindur në vitin 1956, dhe kulmon me shpalljen anëtar i Akademisë së shkencave dhe arteve, i shtetit të Kosovës, në vitin 2014.

Është autor i shumë botimeve, prej të cilave po veçoj SHËNDRIMI I ENTISË, MONOGRAFIA E SHQIPËTARVE NË MAË TË ZI-NË NJË CEP TË ILIRIËS, RELIGJIONI NË BALLKAN, VIRGJËRAT E PËRBETUARA, SHOQERIA PA SHTET dhe kjo e fundit NË BOTËN E PËRBASHKËT.

Nga libri i fundit, meqenëse e kam akoma të freskët, do të veçoja, dhe sidomos do t’ua rekomandoja lexuesve, pjesën që flet për “akomodimin në botën e përbashkët” ku deri në detaje flet për karakterin e përbashkësisë, të cilin “i forti” e shfrytëzon për të forcuar botën e vet, e në dëm të të voglit, si edhe shpjegimin që i bën SINDROMËS SË STOCHHOLMIT, duke u referuar raporteve Shqiptaro-turke”, u shpreh Camaj.

Në fund vlen të ceket se Akademia e shkencave i dhuroi organizatorit të promovimit 100 ekzemplarë, nga 50 nga të dy titujt, për t’ua shpërnda miqve dhe dashamirësve të librit.

Malesia.Org

Furra Tahiri