“Art Club” boton përmbledhjen me poezi “Kungulli ziliqar” të Ibrahim Berjashit

Në kuadër të edicionit botues të Shoqatës së Artistëve dhe Intelektualëve “Art Club”, këto ditë doli nga shtypi vëllimi më i ri poetik “Kungulli ziliqar” i poetit dhe shkrimtarit Ibrahim Berjashi.

Libri është i mbarështruar në pesë cikle, të cilët ndërtojnë një terësi sublime artistike dhe estetike. Vëllimi është ndërtuar me ninulla me motive dhe porosi universale, por hetohen reflektimet krijuese nga ambienti i vendlindjes, e sidomos ninulla nga jeta e përditshme në bregdet. Sikundër në veprat tjera për fëmijë, edhe këtu vargjet përshkohen nga një ndjenjë e hollë humori dhe aventurat e personazheve të ninullave.

Ibrahim Berjashi është ndër autorët e pakët te shqiptarët në Malin e Zi që tash një gjysmë shekulli merret me poezinë për të vegjëlit, por shkruan edhe prozë. Në këtë hark kohor ka botuar shtatë vepra në poezi e prozë për fëmijë.

Redaktor i librit është Ismet Kallaba, ndërsa përgatitjen teknike dhe artistike e ka bërë Gazmend Çitaku.

Libri është botuar me mbështetjen e Ministrisë së Kulturës, ndërsa është shtypur në shtypshkronjën “Press Studio” në Ulqin.

Ibrahim Berjashi ka botuar deri më tash këto libra: “Lule prej guri”, “E tej malësi e det”, “Veloret e bardha”, “Lundra e humbur”, “Orët e vetmisë”, “Floçka e liqenit”, “Dritaren lëre hapur” (Antologji e poezisë shqipe – bashkautor), “Ora e Rumisë”, “Gati u harruem” dhe përzgjedhjen e tregimeve për fëmijë “Sirena e liqenit”. Përmbledhja me poezi për fëmijë “Kungulli ziliqar” është libri i tij i njëmbëdhjetë.

Në kuadër të veprimtarisë së tij botuese “Art Club”, botuesi më i madh ndër shqiptarët në Malin e Zi, ka botuar deri tani mbi 110 libra, kryesisht të autorëve shqiptarë në Malin e Zi.

Ulqin, më 06. 07. 2017 SHAI “Art Club”

Tags: ,